RWANDA: KUBONEKERWA BAMBAYE IMYENDA YERA NGO YANDITSEHO « FDLR MOUVEMENT », GUTUMYE RGB IFUNGA ITORERO RYA EPEMR.

Ubushize twabagejejeho inkuru yerekeye bombori bombori yadutse mu itorero rya EPEMR, ryashinzwe na pasiteri Gasarasi Samson, wahoze muri ADEPR. Mu byateye amakimbirane muri iryo torero ngo nuko uyu pasiteri Gasarasi Samson yatangiye kujya asjinjwa na bamwe mu bayoboke b’idini rye ko avangura amoko kandi ko agenda akwiza ubuhanuzi butiza umwanzi umurindi.

Pasiteri Gasarasi Samson washinze itorero EPEMR

Nkuko bisanzwe bigenda mu Rwanda iyo ibikonyozi bya FPR byakwikomye biruhuka bikwivuganye cyangwa biguhinduye mayibobo. Mu nkuru yasohotse mu kinyamakuru Isange.com, havugwaga ukuntu bamwe mu bayoboke ba EPEMR, bari batangaje ko bitandukanyije na EPEMR, ariko mu by’ukuri ni DMI yari ibiri inyuma, kugira ngo izabone uko isenya burundu EPEMR, maze Pasiteri Gasarasi asigare wenyine. Nyuma y’itekinika rirerire, DMI yashoboye kugera ku ntego yayo, yo guhagarika burundu itorero rya EPEMR, kubera ko RGB yatangaje ko EPEMR yatswe uburenganzira yari yarahawe bwo gukora kumugaragaro. Nkuko byatangajwe na Igihe.com:
 http://www.igihe.com/iyobokamana/amadini/article/leta-yimye-idini-rya-epmr-ry
« Ikigo cy’igihugu cy’Imiyoborere (RGB) cyandikiye idini rya EPEMR (Eglise de Pentecote Emmanuel au Rwanda) ryashinzwe n’abiyomoye kuri ADEPR ibaruwa irihakanira guhabwa icyangombwa cy’agateganyo. Ibaruwa RGB yandikiye EPEMR igaragaza ko nyuma y’ibaruwa iri dini ryanditse kuwa 13 Kamena 2014 risaba icyemezo cy’agateganyo cy’iyandikwa, hari ibyo ryasabwe gukosora ariko ntiryabikora.
Umuyobozi wa RGB, Prof Shyaka Anastase, yanditse avuga ko ashingiye ku ngingo ya 19 n’ iya 27 by’itegeko rigenga imitunganyirize n’imikorere y’imiryango ishingiye ku idini, Ikigo gishinzwe imiyoborere myiza cyasanze EPEMR itujuje ibiteganywa n’ amategeko, afata umwanzuro wo kutayiha icyemezo cy’agateganyo cy’iyandikwa yasabye ».

Imbarutso y’ibi byose ngo yabaye igiterane abakristo ba EPEMR bakoreye i Nyamagabe, mu cyahoze kitwa Gikongoro, maze ngo baza kubonekerwa bibona ngo bose bambaye imyenda yera de yanditseho ngo « FDLR MOUVEMENT ».

Abakristo ba EPEMR mu giterane i Nyamagabe ngo barabonekewe, bibona bambaye imyenda yera yanditseho FDLR Mouvement

Ubu buhanuzi butangiye kuvugwa hanze nibwo igikuba cyacitse, abamaneko ba DMI baracicikana sinakubwira ngo Pasiteri Gasarasi Samson nacibwe umutwe. Ubu rero karabaye, Pasiteri Gasarasi Samson arye ari menge, kubera ko ikigiye gukurikira ni ukumuta muri yombi bakamushinja guhungabanya umudendezo w’igihugu no gukorana n’abanzi.